Директорлар кеңесі Төрағасының үндеуі

Құрметті мүдделі тараптар!

2024 жыл «ҚазМұнайГаз» ҰК АҚ үшін маңызды кезең – орнықтылық, өсу және жаңа жетістіктер жылы болды. Біз әлемдік энергетиканың өзгеру жағдайында алға жылжып, экономикада, сондай-ақ қоғамда, қоршаған ортада, біз жұмыс істейтін әрбір өңірде ұзақ мерзімді құндылықты қалыптастыратын бизнес моделін сенімді түрде қалыптастырамыз.

ҚМГ инвестициялары мұнай өндіру және өңдеу саласындағы операциялық қызметтің тиімділігін арттыру мен портфельді әртараптандырудан бастап, мұнай-газ химиясы мен жаңартылатын энергия көздері жобаларына дейін, қызметкерлерді әлеуметтік қолдаудан бастап, Компания өз қызметін жүргізетін өңірлерде аса маңызды инфрақұрылым салуға дейін бағыттардың кең спектрін қамтиды. Бұл салымдар мультипликативті әсер береді: экономиканың өсуіне ықпал етеді, жергілікті бизнесті қолдайды, өндірістік және кадрлық әлеуетті нығайтады, сондай-ақ бизнес пен экожүйелердің үйлесімдігіне жағдай жасайды.

Орнықтылық корпоративтік басқарудың жүйелік элементі ретінде

2024 жылы біз орнықты дамудың ішкі архитектурасын нығайтуды жалғастырдық. ESG қағидаттары корпоративтік басқарудың барлық деңгейлеріне дәйекті түрде интеграцияланып, Компанияның бизнес-процестерінің ажырамас бөлігіне айналады. ҚМГ Директорлар кеңесінің жанындағы Еңбек қауіпсіздігі, еңбекті, қоршаған ортаны қорғау және орнықты даму комитеті жүргізіліп жатқан жұмыста шешуші рөл атқарады. Жыл бойы оның отырыстарында Төмен көміртекті даму бағдарламасын іске асыру, ESG-тәуекелдерді басқару, еңбекті қорғау және өнеркәсіптік қауіпсіздік жүйелерін жақсарту, сондай-ақ Компанияның БҰҰ-ның Орнықты даму мақсаттарына қол жеткізуге қосқан үлесі жөніндегі мәселелер қаралды.

Осы жүйелі жұмыстың нәтижесі Компанияның ESG тәуекелдерін басқарудың сыртқы бағалауында көрсетілген. Өткен жылдың қарашасында Sustainalytics халықаралық агенттігі ҚМГ-ге ESG тәуекел-рейтингін 32,8 деңгейінде берді, бұл Компанияға мұнай-газ саласында бағаланған 300 компания арасында 49-шы орынды қамтамасыз етті. Сонымен қатар, ESG тәуекелдерін басқарудың орнықты деңгейі Компанияға «BBB» рейтингін берген MSCI агенттігінің бағалауымен де расталды. Сарапшылар көміртек шығарындыларын, биоәртүрлілікті, жер ресурстарын және қалдықтарды басқарудағы прогресті атап өтіп, жерді қалпына келтіру және «жасыл» технологияларды дамыту шараларын оң бағалады.

Қоғам алдындағы жауапкершілік

Мердігерлік ұйымдарды ескергенде, ҚМГ 80 мыңнан астам адамды жұмыспен қамтамасыз еткен еліміздің ең ірі жұмыс берушілерінің бірі болып табылатынын мақтан тұтамыз. 2024 жылы біз орнықты басқарудың заманауи қағидаттары көрсетілген және әрбір қызметкердің кәсіби әлеуетін дамытуға бағытталып, жаңартылған Кадр саясатын бекіттік. Оның негізін ашықтық, әділеттілік, әлеуметтік жауапкершілік, сабақтастық пен мүмкіндіктер теңдігі құрайды. ҚМГ БҰҰ мен ХЕҰ-ны қоса алғанда, халықаралық ұйымдардың қағидаттарын басшылыққа ала отырып, еңбек және адам құқықтары саласындағы жоғары стандарттарды қолдайды.

Біздің әлеуметтік жауапкершілікке деген бейілділігіміз ҚМГ өз қызметін жүргізетін өңірлерді қолдауда да көрініс тапқан. Мысалы, 2024 жылы ең маңызды инфрақұрылымдық жобалардың бірі – Кендірлідегі тұщыландыру зауыты бойынша негізгі құрылыс жұмыстары аяқталды. Бұл жоба Жаңаөзен қаласын сумен тұрақты қамтамасыз етуге, халықтың өмір сүру сапасын арттыруға және ұзақ мерзімді перспективада өңірдің дамуын қолдауға арналған.

Адам құқықтарын сақтау маңызды бағыт болып қала береді. ҚМГ БҰҰ декларациясын және БҰҰ-ның Адам құқықтары аспектісінде кәсіпкерлік қызметтің басшылық қағидаттарын қоса алғанда, халықаралық стандарттарға бейілділігін бекіте отырып, Адам құқықтары жөніндегі саясатты жаңартты.

Экологиялық басымдықтар

Біз климаттық стратегиямызды дәйекті түрде жүзеге асыруды жалғастырамыз. 2024 жылы қабылданған 2060 жылға дейінгі төмен көміртекті даму бағдарламасы парниктік газдар шығарындыларын азайту, ЖЭК үлесін ұлғайту және «жасыл» технологияларды енгізу бойынша нақты мақсаттарды қамтиды.

Біздің күш-жігеріміз қазірдің өзінде нәтиже беруде. ҚМГ-нің климаттық және су тәуекелдерін басқарудағы жетістіктері халықаралық деңгейде танылды – Carbon Disclosure Project бағдарламасына қатысу қорытындылары бойынша Компанияға «B» рейтингі берілді, бұл алдыңғы кезеңдермен салыстырғанда елеулі қадам болды.

2024 жылы ҚМГ OGMP 2.0 халықаралық бастамасының шеңберінде метан шығарындылары бойынша есептілікті дайындап, ұсынды, бұл Компанияның ашықтығының жоғары деңгейін көрсетеді. OGMP 2.0 – БҰҰ-ның Мұнай-газ саласындағы метан шығарындыларын азайту бағдарламасының флагмандық бағдарламасы. Сондай-ақ, ҚМГ терең трансформацияға және үздік әлемдік тәжірибелерді енгізуге ұмтыла отырып, СОР-28-де Мұнай-газ секторын декарбонизациялау жөніндегі хартияға қосылды.

Сонымен қатар, біз жаңартылатын энергетика саласындағы жобаларды дамытуды жалғастырамыз. Итальяндық Eni S.p.A. энергетикалық компаниясымен серіктесе отырып, Жаңаөзенде гибридті (күн+жел+газ) станцияның құрылысын жүргізіп жатырмыз, сондай-ақ Жамбыл облысында «Самұрық-Қазына» АҚ мен француздық Total Eren компаниясымен бірлесіп, қуаты 1 ГВт жел-электр станциясы бойынша жұмысты бастадық. Бұл жобалар Компания ішінде, сондай-ақ ел деңгейінде энергия тұтыну құрылымын өзгертуге негіз қалайды.

Ұзақ мерзімді орнықты өсу

Орнықты дамуға инвестиция салу – болашаққа салынған инвестиция деп сенеміз. Осылайша біз «ҚазМұнайГаз» жолын – жауапкершілікке, көшбасшылық пен серіктестікке негізделген орнықты өсу жолын көреміз. Біз Компанияның күші оның адамдарында, бір мақсатта, қоршаған ортаға қамқорлық жасауда және инновацияларға ұмтылуда екеніне сенімдіміз.

Осы жолда бізді қолдайтындардың барлығына алғыс айтамын. Біз диалогқа ашықпыз, жаңа сынақтарға дайынбыз және ертеңгі күнге сеніммен қараймыз. Орнықты даму – бұл біздің стратегиямыз, біздің миссиямыз.