ҚМГ басшысы Атырау облысындағы мұнай-газ химиясы жобаларын іске асыру барысын тексерді

«ҚазМұнайГаз» ҰК АҚ Басқарма төрағасы Асхат Хасенов Атырау облысына жұмыс сапары кезінде Теңіз кен орнында салынып жатқан жылына 9,1 млрд м³ құрғақ газ өңдейтін Газ сепарациялау кешенінің (ГСК) құрылыс алаңына барды.

ҚМГ басшысы жобаны іске асырудың қазіргі жағдайы, құрылысты жүргізудің бекітілген кестесін сақтау және отандық кәсіпорындарды тарту арқылы қазақстандық қамту үлесін ұлғайту туралы есепті тыңдады.

Бүгінде ГСК жобасының құрылысы қарқын алды: 6 мыңнан астам қада қағылып, кешеннің негізгі нысандарына арналған аумақты дайындау жұмыстары жүргізілуде. Жобаның орындалуының жалпы деңгейі 14% асады.

Сонымен қатар жергілікті қамту үлесін арттыруға бағытталған шаралар қолға алынды — жабдықтар мен құрылыс материалдарының бір бөлігі отандық кәсіпорындарда жасалуда. Атап айтқанда, пропанды сақтау буллиттері, электр энергиясын тарату станциялары, көміртекті болаттан жасалатын бағандар, қысыммен жұмыс істейтін ыдыстар, сыртқы жабыны бар құбырлар, қадалар және басқа да жабдықтар жасауға тапсырыстар берілді.

Қазіргі кезде құрылысқа 1300-ден аса адам жұмылдырылды, оның 70% көбі — Атырау облысының тұрғындары.

Жоба «Силлено» зауытын жылына 1,6 млн тоннаға дейін этанмен қамтамасыз етуге бағытталған. Бұл шикізат «Теңізшевройл» ЖШС жеткізетін құрғақ тазартылған газдан бөлініп алынады.

Магистраль құбыржолдарын салу жобасы бойынша 2025 жылдың соңында EPC-мердігер анықталып, жобалау іс-шаралары (Жұмыс жобасы) қарқынды жүргізілуде. Құрылыс-монтаждау жұмыстары 2026 жылдың екінші жартысында басталады деп жоспарланған.

Бұдан бөлек «Силлено» ЖШС басшылығы жылына 1,25 млн тонна полиэтилен өндіретін зауыт құрылысының барысы туралы баяндады.

Қазіргі уақытта жұмыстар екі негізгі технологиялық қондырғыда жүріп жатыр. Жобаның жалпы ілгерілеу көрсеткіші 28% асады.

Пиролиз қондырғысында қада қағу аяқталуда (96%), іргетас құю (33%) және құбыр эстакадаларын орнатуға арналған жерүсті құрастырмалы темірбетон конструкцияларын монтаждау (24%) іс-шаралары жалғасып жатыр. 2026 жылдың сәуірінен бастап негізгі эстакаданың металл конструкцияларын монтаждау жүргізілуде, мамыр айында құбырларды префабрикация әдісімен алдын ала дайындау басталды.

Жобаны іске асыру үшін отандық өндірушілер мен жеткізушілердің қатысуы маңызды. Биыл ірі габаритті жабдықтардың алғашқы легі, оның ішінде салмағы 1,5 мың тоннаға жуық және биіктігі 101 м болатын этиленді фракциялау бағаналары жеткізіліп, монтаждау жұмыстары жүргізіледі. Олар АтырауМұнайМаш зауытында дайындалуда.

Полимерлеу қондырғысының учаскесінде және зауыттың жалпышаруашылық нысандарының жер жұмыстары (26%) және қада қағу (37%) жалғасуда.

Бүгінде алаңда 1700-ден астам адам еңбек етіп, 300-ден аса техника жұмылдырылған. Құрылыс-монтаждау жұмыстарының негізгі көлемін қазақстандық компаниялар орындауда.

Зауытты пайдалануға беру және алғашқы өнімді шығару 2029 жылға жоспарланып отыр.