«ҚазМұнайГаз» мұнайшылары Президент сайлауында белсенділік танытты

Бүгін, 2022 жылы 20 қарашада «ҚазМұнайГаз» компаниялар тобының қызметкерлері Қазақстан Республикасы Президентінің кезектен тыс сайлауында өз таңдауын жасап, белсенділік танытуда. Өндіріс орындарының еңбек ұжымдары өз елінің болашағына дауыс беру үшін сайлау учаскелеріне асықты.

Мұнайшылар алдағы 7 жыл ішінде Мемлекет басшысы кім болатынын анықтау үшін дауыс беруге барды. Жұмыс ауысымы алдында сайлауға асығып келгендердің бірі — «Қаражанбасмұнай» АҚ-да цех операторы болып жұмыс істейтін Әліби Жолдыбаев болды.

«Мен Отанымыздың тағдыры анықталатын осы маңызды күнде өз таңдауымды жасауға келдім. Цехтағы әріптестеріммен бірге дауыс бердік. Біз халықтың мүддесі мен әл-ауқаты бірінші орында тұратын оң өзгерістерді күтеміз», — деп атап өтті Әліби Жолдыбаев.

Бұл күні ҚМГ-нің мыңдаған ұжымымен бірге «Маңғыстаумұнайгаз» акционерлік қоғамының мұнайшылары да сайлаудан тыс қалмады. Мәселен, «Қаламқасмұнайгаз» өндірістік басқармасының («Маңғыстаумұнайгаз» АҚ) әлеуметтік тобының қызметкері Еділ Бекмұратов сайлау учаскесіне алғашқылардың бірі болып келді.

«Мұнайшылардың сайлауға белсенді қатысып, конституциялық құқығын пайдаланып, дауыс беріп жатқаны қуантады. Қазақстанның болашағы жарқын болатынына сенемін және соған үміт артамын», — дейді Еділ Бекмұратов.

«ҚазМұнайГаз» ҰК АҚ Басқарма төрағасы Мағзұм Мырзағалиев те өз таңдауын жасады. Ол  Twitter аккаунтында «Менің таңдауым — қуатты Қазақстан» деп жазба қалдырды.

Бақылаушылар сайлаушылардың белсенділігін, ұйымдастыру деңгейін және ашықтықты атап өтті. Естеріңізге сала кетейік, Қазақстанда Президент сайлауына барлығы 10 мыңнан астам учаске ашылды, сондай-ақ 53 елде 68 сайлау учаскесі жұмыс істеп тұр. Оның ішінде Румыния мен Грузияда ҚМГ еншілес кәсіпорындарының қазақстандық қызметкерлері ҚР Президентін сайлауға белсенді қатысуда.