Қазақ газ өңдеу зауытында жаңа компрессорлық қондырғылар іске қосылды

Маңғыстау облысындағы «Қазақ газ өңдеу зауыты» ЖШС-де (ҚазГӨЗ) қарашаның 23-і күні жаңа компрессорлық қондырғыны салу және пайдалануға беру жұмыстарына белсенді атсалысқан кәсіпорынның 79 қызметкерін салтанатты марапаттау рәсімі өтті.

Еске сала кетейік, зауытта 1 қарашада Waukesha маркалы (АҚШ өндірісі) газ поршенді қозғалтқышы бар Ariel маркалы бес жаңа компрессорлық қондырғы пайдалануға берілді. Бұл өңдеуге қабылданатын газ көлемін 20%-ға арттыруға мүмкіндік берді.

Осы компрессорлық қондырғылардың көмегімен шикі газ сығымдалады, одан кейін сығымдалған газ күкірттен тазарту үшін келесі кезеңге жіберіледі. Жаңа қондырғылар 2022 жылдың қаңтарында қабылданған «ҚазГӨЗ жабдығының беріктігін қамтамасыз ету жөніндегі 2022-2025 жылдарға арналған бағдарламасына» сәйкес «Жаңа компрессорлық қондырғының құрылысы» жобасы бойынша пайдалануға берілді. Аталмыш бағдарлама Жаңаөзен қаласындағы жаңа газ өңдеу зауытының іске қосылуына дейін кәсіпорынның үздіксіз жұмысын қамтамасыз етуге мүмкіндік береді.

Іс-шараның бағдарламасы бойынша негізгі техникалық және моралдық тұрғыдан тозығы жеткен сыйымдылық, бағаналық, сорғы компрессорлық жабдықты ауыстыру жоспарланған. Жобаның басты мақсаты – өнеркәсіптік, экологиялық, өрт қауіпсіздігін қамтамасыз ету, сондай-ақ өңдеуге қабылданатын шикі газды ұлғайту есебінен дайын өнімнің көлемін арттыру.

ҚазГӨЗ («ҚазМұнайГаз» ҰК АҚ құрамына кіреді) «Өзен» кен орнын пайдалану кезінде алынатын ілеспе мұнай газын кәдеге жаратады және Маңғыстау облысындағы сұйытылған газдың басты жеткізушісі. 2022 жылдың қаңтар-қараша аралығында зауыт өңір қажеттілігіне тауар газын өндіріп шығару және жөнелту бойынша барлық міндетін атқарды. Өз кезегінде, құрылыс-монтаждау жұмыстары, сондай-ақ жаңа компрессорларды қолданыстағы коммуникацияларға қосу және пайдалануға беру жұмыстары өндірісті тоқтатпай жүргізілді.