Ақтауда ҚМГ-ның мұнай сервистік компаниялары қызметіне қатысты жиын өтті

«ҚазМұнайГаз» ҰК АҚ Басқарма төрағасы Асхат Хасенов ҚМГ-ның еншілес мұнай сервистік ұйымдарымен жиналыс өткізіп, онда 2025 жылы атқарған жұмыс нәтижелері және 2030 жылға дейінгі даму жоспарлары қаралды.   

«Oil Services Company», «Oil Construction Company», «Ойл Транспорт Корпорейшэн», «Өзенмұнайсервис», «Кен-Құрылыс-Сервис», «Маңғыстауэнергомұнай», «Су өндіру және тасымалдау басқармасы», «Мұнайтелеком» және «KMG EP-Catering» мекемелерінің есептері тыңдалды.

2025 жылдың 10 айында мұнай сервистік компаниялар Маңғыстау облысында мұнай өндіру деңгейін ұстап тұру үшін «Өзенмұнайгаз» АҚ (ӨМГ) мен «Маңғыстаумұнайгаз» АҚ-да (ММГ) іс-шаралар кешенін жүзеге асырды. Атап айтқанда, ММГ компаниясында 76 ұңғыма бұрғыланып, 4311 ұңғымада жерасты жөндеу жұмыстары жүргізілді. Күрделі жөндеу ӨМГ-ның 591 ұңғымасында және ММГ-ның 528 ұңғымасында атқарылды. Ұңғымаларды жайластыру іс-шаралары ММГ-ның 120 нысанында және ӨМГ-ның 74 нысанында жүргізілді. 

Сонымен қатар мұнай сервистік кәсіпорындар ММГ құбырларының 109 шақырымын күрделі жөндеуден өткізіп, ӨМГ компаниясына қарасты 67 км мұнай құбыры мен 19 км газ құбырларын реконструкциялады. 

Жиын қорытындысы бойынша А.Хасенов операциялық тиімділікті арттыру, шығын көлемін оңтайландыру, жабдықтар мен арнайы техниканы жаңарту, цифрлық технологиялар мен автоматтандыруды енгізу, қызметкерлердің әлеуметтік-тұрмыстық жағдайын жақсарту жөніндегі жұмысты жалғастыруды тапсырды.