«ҚазТрансОйл» АҚ өз қызметкерлері үшін заманауи нысанды пайдалануға берді

Маңғыстау мұнай құбыры басқармасының «Қаражанбас» мұнай айдау станциясында вахталық ауысыммен жұмыс істейтін қызметкерлердің еңбек және тұрмыс жағдайларын жақсарту мақсатында екі қабатты әкімшілік-тұрмыстық ғимарат пайдалануға берілді. Корпус 152 адамға есептелген, оның жалпы ауданы — 1406 м².

Жобалау және құрылыс жұмыстары барысында ыңғайлы, қауіпсіз әрі функционалды еңбек ету ортасын қалыптастыруға ерекше мән берілді. Нысан соңғы үлгідегі жиһазбен, 32 дана кеңсе техникасымен, серверлік және байланыс жабдықтарымен, сондай-ақ вентиляциялық және жылыту жүйелерімен толық жабдықталған.

Озық техникалық шешімдер қолданып, тиімді жоспарлау арқылы салынған жаңа нысан «Қаражанбас» мұнай айдау станциясы қызметкерлерінің еңбек жағдайы мен тұрмыс жайлығын едәуір жақсартуға мүмкіндік берді.