Атырауда «KMG Skills» кәсіби шеберлік чемпионаты басталды

Бүгін Атырау қаласында «ҚазМұнайГаз» ҰК АҚ компаниялар тобындағы қызметкерлердің кәсіби шеберлігін арттыруға және жұмысшы мамандықтарын дәріптеуге бағытталған «KMG Skills» кәсіби шеберлік чемпионаты салтанатты түрде ашылды.

12–14 қазан аралығында ҚМГ-ның 18 еншілес және тәуелді ұйымынан келген 120 қатысушы өз мамандығы бойынша үздік атану үшін бақ сынайды. Биыл «KMG Skills» чемпионаты екінші рет ұйымдастырылып отыр.

Жарыс 12 мамандық иелері арасында өтеді. Атап айтқанда, мұнай және газ өндіру, қабат қысымын ұстап тұру, мұнайды дайындау, технологиялық қондығылардың операторлары, химиялық талдау зертханашылары, электромонтерлер, электр-газбен дәнекерлеушілер, бақылау-өлшеу аспаптары мен автоматика, технологиялық жабдықты жөндеу мен оған қызмет көрсету жөніндегі слесарьлер, компрессорлық қондырғының, технологиялық сорғылардың машинистері, сондай-ақ токарьлер өзара сынға түседі.

Чемпионат бағдарламасы үш кезеңнен тұрады:
- қауіпсіздік техникасы талаптарының бұзылуын анықтау;
- алғашқы медициналық көмек көрсету;
- мамандық бойынша практикалық тапсырмаларды орындау.

Байқау «Ембімұнайгаз» АҚ («Жайықмұнайгаз» МГӨБ), «Атырау мұнай өңдеу зауыты» ЖШС және APEC PetroTechnic жоғары колледжінің алаңдарында өтеді.

Қатысушылардың кәсіби біліктілігін объективті бағалау үшін 40-тан астам тәуелсіз сарапшы тартылды.

«KMG Skills» үздік мамандарды анықтауға, олардың кәсіби дағдыларын одан әрі жетілдіруге және жұмысшы мамандықтарының беделін арттыруға бағытталған. Сонымен қатар чемпионат ҚМГ компаниялар тобының кәсіпорындары арасында тәжірибе алмасуға және кәсіби білімді бөлісуге жағдай жасайды.