ҚазМұнайГаз, Сибур және Sinopec полиэтилен өндіретін зауыт салу жобасының іске асырылуын талқылады

2024 жылы 18 сәуірде Астанада «ҚазМұнайГаз» ҰК АҚ (ҚМГ) Басқарма төрағасы Мағзұм Мырзағалиев «СИБУР» ЖШҚ басқарма төрағасы және бас директоры Михаил Карисаловпен және China Petrochemical Corporation (Sinopec) президенті Джао Донгпен кездесті.

Тараптар Атырау облысында жылына 1,25 млн тонна полиэтилен өндіруге қауқарлы зауыт салу жобасының іске асырылуын талқылады.

«Ортақ күш-жігеріміздің арқасында Қазақстанда ең ауқымды газ-химия жобасын табысты іске асыратынымызға сенімдімін. Бұл жоба ел экономикасы үшін стратегиялық маңызға ие, сондай-ақ ҚазМұнайГаздың ұзақ мерзімді стратегиялық мақсаттарына жауап береді», — деп атап өтті ҚМГ басшысы М.Мырзағалиев.

Полиэтилен өндіретін болашақ зауыттың жобалық қуаты — жылына 1,25 млн тонна. Кәсіпорын Қарабатандағы арнайы экономикалық аймақтың аумағында Теңіз кен орнына (Атырау облысы) жақын жерде салынатын болады.

Былтыр 17 қазанда Бейжің қаласында Қазақстан Президентінің қатысуымен ҚМГ, СИБУР және Sinopec полиэтилен өндіру жөніндегі жобаға қатысу үлесін сатып алу-сату шарттарына қол қойған.

Полиэтилен бірқатар тұрмыстық, өнеркәсіптік өнімдер мен тауарлар өндірісінде қолданылады, мысалы, полиэтилен құбырлары, құрылыс және орау материалдары, автокомпоненттер және басқалар.

Анықтамалық ақпарат:

«ҚазМұнайГаз» ұлттық компаниясы» АҚ — Қазақстанның вертикалды интеграцияланған жетекші мұнай-газ компаниясы. ҚМГ көмірсутектерді барлау мен өндіруден бастап тасымалдауға, өңдеуге және мамандандырылған қызметтер көрсетуге дейінгі бүкіл өндірістік цикл бойынша активтерді басқарады. 2002 жылы құрылған Компания еліміздің мұнай-газ саласында Қазақстанның мүддесін қорғайды.

«Силлено» ЖШС — Атырау облысындағы алғашқы интеграцияланған газ-химия кешенін салу жобасының екінші кезеңінің операторы («Полиэтилен» жобасы). Серіктестік — жоба салынатын «Ұлттық индустриялық мұнай-химия технопаркі» арнайы экономикалық аймағының қатысушысы.

Sinopec — әлем бойынша BASF компаниясынан кейінгі ірі химиялық компания, вертикалды интеграцияланған энергетика және мұнай химия корпорациясы. Компаниялардың жылдық кірісі негізінде жасалатын Fortune Global 500 рейтингінде 2023 жылы Sinopec алтыншы орынға ие болды.

«СИБУР Холдинг» (СИБУР) — полимерлер мен резеңке өндіретін ресейлік көшбасшысы компания, мұнай-газ химия холдингі. 2023 жылдың наурыз айында СИБУР Полиэтилен жобасына ресми түрде кірді.