ҚазМұнайГаз және Huawei өзара ынтымақтастықты дамытуға дайын

«ҚазМұнайГаз» ҰК АҚ Басқарма төрағасының орынбасары Дмитрий Макеев ҚХР-ға сапары барысында Huawei компаниясының Бейжіңде орналасқан зерттеу және әзірлеу орталығында (R&D) болып, «Huawei Middle East & Central Asia» вице-президенті Ван Шунлимен кездесті.

Тараптар қос компанияның ынтымақтастық мүмкіндіктерін талқылады. Ван Шунли Huawei компаниясының телекоммуникация, жасанды интеллект, ақпараттық технологиялар, заттар интернеті және цифрлы энергетика саласындағы жетістіктерін баяндады.

Д.Макеев өз кезегінде өндіріске цифрлы шешімдерді енгізу ҚМГ-нің басым міндеттерінің бірі екенін атап өтті. Ұлттық компания қазірдің өзінде «Huawei Fusion Module 1000A» контейнерлік деректер орталығын қолданады. ҚазМұнайГаздың еншілес кәсіпорындары да қытай компаниясының жабдықтарын (коммутаторлар, радиорелелік жүйелер, WiFi контроллер, қосылу нүктелері, телефон станциялары, IP-телефондар, серверлер және т.б.) кеңінен пайдаланады.

ҚМГ басшысының орынбасары қазақстандық мұнай-газ операторының Huawei-мен өзара байланысты арттыруға дайын екенін жеткізді және қытайлық әріптестердің Қазақстандағы өкілдерін Астанадағы ҚазМұнайГаз кеңсесіне цифрлы диспетчерлік-талдау орталығының қызметімен танысуға шақырды.

Анықтама:

Huawei — ақпараттық-коммуникациялық технологиялар саласындағы озық шешімдер ұсынатын әлемдегі жетекші компания. Ол зерттеулер мен әзірлемелерге құйған инвестиция көлемі бойынша әлемде 2-орында (компанияның 195 мың қызметкерінің 54,8%-ы зерттеумен айналысады) және «Best Global Brands» рейтингінде 9-орынға ие.