Қаражанбасмұнай автопаркін жаңартуды жалғастыруда

«Қаражанбасмұнай» АҚ (ҚазМұнайГаздың еншілес кәсіпорны) автопаркіне жаңа 12 арнайы техника қосылды. Технологиялық көлік департаменті қызметкерлеріне 25 тонналық автокран кілттері табысталды.

Жаңа автокрандар ұңғымаларды орнату, өндірістік-техникалық жабдықтарды көтеру, бұрғылау қондырғысын көшіру, ұңғымаларды күрделі және жерасты жөндеу үшін пайдаланылады. Бұл өндірістегі жұмысты жеңілдетіп, тиімділікті арттыруға айтарлықтай әсер етеді.

Жыл басынан бері ҚБМ автопаркі жалпы саны 63 техникамен толықты. Көліктерді жаңарту бағдарламасы аясындағы жұмыстар жоспар бойынша жалғасады.