«ҚазМұнайГаз» және CGGC ынтымақтастық перспективаларын талқылады

«ҚазМұнайГаз» ҰК АҚ Басқарма төрағасының орынбасары Серікқали Брекешев «China Gezhouba group Co., Ltd» (CGGC, ҚХР) корпорациясының вице-президенті Дэн Инцимен кездесті.

Тараптар ҚМГ компаниялары тобы бойынша жоспарланған жобаларды іске асырудағы ынтымақтастық перспективаларын талқылады.

Атап айтқанда, Өріктау кен орны базасында газ өңдеу зауытын салу, «ҚазМұнайГаз» еншілес ұйымдарының кен орындарында шламды бөлу технологиясын енгізу, төмен көміртекті саясатқа қол жеткізу мақсатында жаңартылатын энергия көздерін (ЖЭК) пайдалану және т. б. сұрақтар талқыланды.

С. Брекешев қытай корпорациясының басшылығына аталған және басқа да бағыттар бойынша жобаларды іске асырудағы әріптестікті дамытуға қызығушылық танытқаны үшін алғыс білдірді.

Анықтама:

CGGC қызмет аясы 12 бағытты қамтиды, оның ішінде гидроэнергетика, ЖЭК, жылу энергетикасы, сумен жабдықтау және ағынды суларды өңдеу, магистральдық мұнай және газ құбырларын салу. Корпорация тың зерттеулер жүргізумен бірге, мұнай-газ өнімдерін биосепарациялау технологиялары саласында үлкен тәжірибеге ие.