ҚМГ басшысы Ақтаудағы «Caspi Bitum» зауытын кеңейту барысымен танысты

Маңғыстау облысына жұмыс сапары барысында «ҚазМұнайГаз» ҰК АҚ (ҚМГ) Басқарма төрағасы Асхат Хасенов «Caspi Bitum» БК ЖШС-нің Ақтау битум зауытына барды.

ҚМГ басшысы мұнай өңдеу қуатын жылына 1,5 млн тоннаға дейін ұлғайту жөніндегі жобаның іске асырылу барысымен танысты. Бұл мұнайды бастапқы өңдейтін ЭЛТҚ-АВҚ қондырғысын жаңғырту есебінен жол битумын өндіруді жылына 500-ден 750 мың тоннаға дейін ұлғайтуға мүмкіндік береді.

Кеңейтілетін және жаңғыртылатын ЭЛТҚ-АВҚ кешенді қондырғысы екі технологиялық блоктан тұрады. Бірінші блок — ЭЛТҚ (электр тұзсыздандыру қондырғысы) шикі мұнайды тұзсыздандыруға және сусыздандыруға арналған. Екінші блок — АВҚ (атмосфералық-вакуумдық құбыршек) құбырлы пеште қыздыруды, атмосфералық қысым кезінде ректификацияны және төмен қысым (вакуум) кезінде ректификацияны қолдана отырып, құрамында асфальтшайырлы заттары бар жоғары қайнайтын вакуумдық қалдықтың мұнайдан бөлінуін қамтамасыз етеді. Алынған шикізат гудрон тотығу блогына жіберіледі, одан тотыққан жол битумы алынады. Сондай-ақ шикізаттың (гудронның) бір бөлігін битум модификациясын орнатуға бір мезгілде бағыттау мүмкіндігі бар. Бұл қондырғыда гудронға полимерді модификатор (SBS) қосу жолымен гомогендеу және диспергирлеудің технологиялық процесі өтеді, процесс нәтижесінде модификацияланған жол битумы алынады.

Бүгінгі таңда жаңғырту жобасы аясында демонтаж жұмыстары мен фундамент құю жұмыстары толығымен аяқталды. Жабдықтарды, құбырларды, бақылау-өлшеу аспаптарын, электр және автоматика жабдықтарын монтаждау жұмыстары жүргізілуде.

Жабдықтарды құрылыс алаңына жеткізуді наурыз айының ортасына дейін аяқтау жоспарлануда. Жобаны іске асыру қарқынын жеделдету үшін мердігер жабдықардың жеткізілуіне байланысты құрылыс-монтаж жұмыстарын үзіліссіз тәулік бойы жүргізуге міндеттенеді (221 адам жұмылдырылған). Жоба іске асырылғанда ішкі нарық отандық жоғары сапалы жол битумымен толық қамтамасыз етілетін болады.

Кеңесте кәсіпорынның 2024 жылғы жұмыс қорытындысы және жүргізіліп жатқан жаңғырту жұмыстарының өзекті мәселелері талқыланды. 2024 жылдың қараша айында басталған жұмыстарды бас мердігер CITIC Construction (CITIC Group-тың еншілес кәсіпорны) жүргізеді. Жобаға салынған күрделі инвестициялар 76 млн АҚШ долларынан асады. Жұмысты аяқтау, битум өндірісінің толық технологиялық режиміне шығу және зауытты іске қосу ағымдағы жылдың екінші тоқсанына жоспарлануда.

Кеңес қорытындысы бойынша А.Хасенов "Caspi Bitum" БК ЖШС басшылығына жобаны мерзімінде аяқтау үшін барлық бағыттар бойынша жұмысты жалғастыруды тапсырды.

«Caspi Bitum» БК ЖШС 2024 жылы 654 602 тонна мұнай өңдеп, 242 877 тонна жол битумын өндірді.

Жол-құрылыс мекемелері тарапынан битум жеткізуге берілетін өтінімдердің азаюына байланысты жоспардың орындалуы төмендеді, бырақ Ақтау битум зауыты жыл бойы жоғары өнімділік жағдайында жұмыс істеуге дайын.

Естеріңізге сала кетейік, Битумды — Ақтау битум зауытынан басқа Қазақстанда Павлодар мұнай -химия зауыты (ПМХЗ — ҚМГ еншілес ұйымы) және тағы екі жеке зауыт өндіреді, жалпы еліміз бойынша жыл сайын 1 миллион тоннаға жуық жол битумы өндіріледі.