ҚМГ-Аэро Қырғызстанның Asman Airlines әуе компаниясының рейстеріне жанармай құя бастады

ҚМГ-ның еншілес компаниясы — «ҚазМұнайГаз-Аэро» ЖШС Алматы халықаралық әуежайында Қырғыз Республикасының мемлекеттік Asman Airlines компаниясының әуе кемелеріне жанармай құю қызметін көрсете бастады. Ынтымақтастық аясында ҚМГ-Аэро Тамшы – Алматы – Тамшы бағыты бойынша дүйсенбі мен жұма — аптасына екі рет орындалатын Asman Airlines тұрақты рейстерін авиаотынмен қамтамасыз етеді.

Бағыттар желісін дамыту және халықаралық әуе тасымалдаушылары үшін қолайлы жағдай жасау Мемлекет басшысының еліміздің көлік-логистикалық әлеуетін нығайту жөніндегі тапсырмаларына, сондай-ақ ҚР Үкіметі қойған міндеттерге сай келеді. ҚМГ-Аэро серіктестеріне сапалы әрі сенімді авиаотын құю қызметтерін ұсынып, ынтымақтастық аясын жүйелі түрде кеңейтіп келеді.

Қазіргі уақытта тараптар серіктестікті одан әрі нығайту мәселелерін, соның ішінде Asman Airlines әуе компаниясының Қазақстанның басқа әуежайларына да жаңа бағыттар ашу мүмкіндігін талқылап жатыр. Осы жоспарларды іске асыру екіжақты әуе қатынасын ұлғайтуға, өңірдегі көлік байланысын арттыруға және халықаралық маршруттар желісін дамытуға мүмкіндік береді.

Анықтама: Asman Airlines — 2024 жылы құрылған Қырғыз Республикасының мемлекеттік әуе компаниясы («Қырғызстан әуежайлары» ААҚ-ның 100% еншілес ұйымы). Әуе тасымалдаушысы сыйымдылығы 80 жолаушыға дейін жететін Dash Q400 турбовинтті ұшақтарын (Канаданың жолаушыларға арналған ұшақ тобы) пайдаланады. Компания Қырғызстанның негізгі қалаларына, сондай-ақ халықаралық бағыттарға, соның ішінде Алматыға (Қазақстан) және Худжандға (Тәжікстан) қатынайды.