ҚМГ мен Air Products ынтымақтастық перспективаларын талқылады

Астанада «ҚазМұнайГаз» ҰК АҚ Басқарма төрағасы Асхат Хасенов «Air Products and Chemicals, Inc.» корпорациясының Еуропа және Африка аймақтары бойынша президенті Иво Болсоммен кездесті. 

Тараптар мұнай өңдеу және мұнай-газ химиясы саласындағы өзара іс-қимыл перспективаларын, сондай-ақ инвестиция тарту мәселелерін қарастырды.

Америкалық компания өкілдері өнеркәсіптік мақсатта қолданылатын газдар мен химикаттарды өндірудегі өздерінің технологиялық мүмкіндіктерін таныстырды. Сонымен қатар Air Products Қазақстан нарығында қатысуын кеңейту бойынша жоспарларымен бөлісті. 

Кездесу соңында тараптар өзара тиімді ынтымақтастықтың барлық маңызды бағыттары бойынша жұмысты күшейтуге келісті. 

Анықтама: 
Штаб-пәтері Аллентаун қаласында (Пенсильвания штаты, АҚШ) орналасқан «Air Products and Chemicals, Inc.» корпорациясы 1940 жылы құрылған. Бүгінде компания әлемнің 50 елінде өз жобаларын іске асыруда.