ҚМГ мен Air Liquide бірлескен жобасы Павлодар зауытында қысқы дизель отынын өндіруге мүмкіндік береді

Бүгін Астана халықаралық форумы 2023 барысында «Павлодар мұнай-химия зауыты» ЖШС (ПМХЗ) мен «Эр Ликид Мұнай Тех Газы» ЖШС (ЭЛМТГ) арасында сутегі өндіретін қондырғы салу туралы келісімге қол қойылды. Құжатқа «ҚазМұнайГаз» ҰК АҚ (ҚМГ) Басқарма Төрағасы Мағзұм Мырзағалиев пен Францияның «Air Liquide» химия компаниясының президенті Франсуа Жаковтың кездесуі қорытындысы бойынша қол қойылды.

«Біз әлемдегі өнеркәсіп, денсаулық сақтау және қоршаған ортаны қорғау саласы үшін газ өндіретін көшбасшы компания «Air Liquide»-пен  серіктестікті жоғары бағалаймыз. Біздің үш зауытта — ПМХЗ, АМӨЗ және KPI-да 5 жобаны бірлесіп табысты іске асыруымыз осының дәлелі бола алады. Сутегі мен азотты жеткізуге 20 жылға дейінгі ұзақ мерзімді келісімшарттар жасалды», — деп атап өтті М.Мырзағалиев.

ПМХЗ мен бірлескен ЭЛМТГ компанияларының арасындағы бұл келісім зауытта жылына 160 мың тоннаға дейін көлемде қысқы дизель отынын өндіруге мүмкіндік беретін сутегі өндірісінің жаңа қондырғысын салу жобасына бастама береді. Болжам бойынша жоба құны — 80 миллион еуро.

ҚМГ мен «Air Liquide Eastern Europe S.A.» арасында ынтымақтастық туралы келісімге былтыр қарашада Қазақстан Президенті Қасым-Жомарт Тоқаевтың Францияға ресми сапары кезінде француз іскер топтарының өкілдерімен кездесу барысында қол қойылды.

Ақпарат үшін:

«Эр Ликид Мұнай Тех Газы» ЖШС — Air Liquide пен «ҚазМұнайГаз» ҰК АҚ компанияларының бірлескен кәсіпорны, үлесі тиісінше 75% және 25%. 2016 жылы негізі құрылды. 2018 жылдан бастап Павлодар мұнай-химия зауытында, 2021 жылдан бастап Атырау мұнай өңдеу зауытында сутегі мен азот өндіру қондырғыларының жұмысын табысты жүргізіп келеді. Одан бөлек, ЭЛМТГ 2021 жылдан бастап Атырау қаласы маңындағы Қарабатанда жаңадан салынған азот өндіру қондырғысында өнеркәсіптік өндірісті бастады.