ҚМГ мұнай өңдеу зауыттары битум сатпайды және экспортқа шығармайды

«ҚазМұнайГаз» ҰК АҚ мұнай өңдеу зауыттары тек мұнай өңдеумен және мұнай өнімдерін өндірумен айналысады, сонымен қатар битумды жол-құрылыс ұйымдарына коммерциялық жолмен сатпайды.

 Бүгінде Қазақстан Республикасында битум өндіру мен сату схемасы мынадай:

1. ҚР Энергетика министрлігі ресурс ұстаушыларға арнап Жол битумын жеткізу жоспарын ай сайын бекітеді. Жоспарда жол битумын тауар биржалары арқылы сату көлемдері көрсетіледі (әрбір ресурс ұстаушы бойынша жоспарлы өндіруден 10%).
2. Ресурс ұстаушылар өз битумын тікелей жол-құрылыс компанияларына сатады.

«ҚазМұнайГаз» ұлттық компаниясының құрылымында битумды екі кәсіпорын өндіріп шығарады: Ақтау битум зауыты (Caspi Bitum) және Павлодар мұнай-химия зауыты (ПМХЗ). Екі зауыт 2022 жылға арналған өндіріс жоспарын орындап келеді.

2022 жылдың 7 айында ҚМГ-ның екі мұнай өңдеу зауыты 401,2 мың тонна битум өндірді, соның ішінде Caspi Bitum – 247,8 мың тонна және ПМХЗ – 153,4 мың тонна.

«ҚазМұнайГаз» ҰК АҚ-ның екі мұнай өңдеу зауытында 2022 жылы барлығы 733 мың тонна битум өндіріледі деп жоспарланып отыр. Осылайша, ҚМГ елдің жол битумына қажеттілігінің шамамен 70%-ын қамтамасыз ететін болады.

ПМХЗ мен Caspi Bitum зауыттарында өндірілетін битум тек ішкі нарықта сатылады және экспортқа шығарылмайды.